Sisimiut

Sisimiut 5498-inik innuttaasoqarluni Qeqqata Kommuniani illoqarfiit annersaraat. Ilutigalugu Sisimiut Nunatsinni illoqarfiit annersaasa aapparaat, inuiaqatigiinnilu illoqarfiit aaqqissuussaanerinut pingaarutilittut inissisimalluni. Inuusuttunut ilinniarfissaaloqarluni teknikkimut tunngasunik ilinniarfissaqarluni illoqarfiuvoq nuimasoq, Royal Greenland-ilu aalisakkeriveqarluni aalisarnermi umiarsualiviit pingaarnersaannut angerlarsimaffiulluni. Nunatsinni selskaberpaaluit soorlu KNI-p, Pisiffik-up INI-llu qullersaqarfii Sisimiuniipput.

Innuttaasunut nalinginnaasumik, aammali inuussutissarsiortunut pitsaasunik atugassaqartitsinissaq tunngavissat pingaarnerit siunertaraat. Pingaartumik inuussutissarsiutit ineriartortut, takornarialerisut, aatsitassarsiornermut tunngasunik suliaqartut, uuliamik gas-imillu misissuisut, neriunartumillu siunissami nioqqutissiortussat kiffartuunneqarnerini periarfissat ineriartortinneqarnissaat siunertaavoq.

Innuttaasut amerliartornerini pissusissamisuuginnartumik nutaanik illuliortoqartariaqarpoq, pisortallu kiffartuussinissamik neqeroorutaat annertusineqartariaqarlutik. Ineriartortitsissagaanni inuussutissarsiutitigut ineriartortitsineq tapersersorneqartariaqarpoq, ilinniartitaanermullu avatangiisit nukittorsarneqartariaqarlutik.

Inuussutissarsiutit ineriartortut pingaartinneqartariaqarput
Najugaqarfiit pilerinartuusariaqarput
Inuussutissarsiorfiusinnaasut pilerinartuusariaqarput
Aqqusinersuarmi pisiniarfiit sanileriiaartariaqarput
Sanaartornermik Ilinniarfiup eqqaani nunataqartariaqarpoq
Nalunnguarfik sinerlugu innuttaasunut sammisassaqartitsivik
Nunap timaani aasaanerani ukiukkullu sunngiffimmi sammisassat ineriartortinneqartariaqarput

1999-imit 2011 tikillugu innuttaasut amerlassusii aallaavigigaanni, taamatut ineriartortoqaannassappat 2024-mi Sisimiuni innuttaasut 5874-iussapput.

Sisimiuni inuussutissarsiutit ineriartortut ilinniarfiillu ineriartortinneqarnissaat aallaavigalugit annertuumik ineriartortitsisoqarsinnaagaluarpat, innuttaasut amerleriarnerunissaat naatsorsuutigisariaqarpoq.

Innuttaasut amerliartornissaat, aalajaatsumillu amerliartornerat attatiinnarumallugu, inuussutissarsiutit ineriartortut ukiuni tulliuttuni qanimut malinnaavigineqartariaqarput.